८ हजारले चलाए सहुलियत भिडियोकल

August 1, 2017

सरोकार संवाददाता
काठमाडौं । नेपाल टेलिकमले बोल्न र सुन्न नसक्ने व्यक्तिहरुका लागि सहुलियत दरमा उपलब्ध गराएको भिडियो कल सेवा एक वर्षको अवधिमा ७ हजार ८४ जनाले उपभोग गरिरहेका जनाएको छ । टेलिकमले गत वर्ष असार ३१ देखि सहुलियत दरमा यो सेवा उपलब्ध गराएको थियो ।

कम्पनीले संस्थागत सामाजिक उत्तरदायित्व अन्तर्गत बोल्न र सुन्न नसक्ने व्यक्तिहरुका लागि सहुलियत दरमा भिडियो कल तथा एसएमएस सेवा सुरु गरेको जनाएको छ । टेलिकमको मोबाइल नम्बर (सिम) मा टेलिकमको नेटवर्क भित्रको लागि मात्र उपलब्ध गराइएको यो सेवाको महसुल प्रतिमिनेट ५० पैसा (करबाहेक) तोकिएको थियो । साथै बोल्न र सुन्न नसक्ने व्यक्तिहरुका लागि २०७० माघ देखि एसएमएसको शुल्क प्रति एसएमएस २० पैसा (करबाहेक) का दरले तोकिएको थियो ।

यो सेवा लिनका लागि शारीरिक अपाङ्गता भएका व्यक्तिहरुले महिला, बालबालिका तथा समाज कल्याण मन्त्रालयबाट जारी भएको परिचय पत्र (रातो कार्ड) सहित एकप्रति फोटो र आफ्नो नागरिकताको प्रतिलिपि पेश गर्नुपर्ने व्यवस्था छ । यी सबै सेवाका लागि आफूलाई पायक पर्ने नेपाल टेलिकमको काउन्टरमा सम्पर्क राख्न सकिने जनाइएको छ ।

यद्यपि अपांगता क्षेत्रका अभियन्ताहरूले भने सबै बोलाइ तथा सुनाइसम्बन्धि अपांगता भएकाले रातोकार्ड नपाउने भएकाले हालको वर्गीकरणअनुसार ख वर्गको नीलोकार्ड पाउनेले पनि यस्तो सुविधाको माग गरेका छन् ।

Comments

Tell me what you're thinking...
and oh, if you want a pic to show with your comment, go get a gravatar!