बेनीको तातोपानी कुण्ड अपाङ्गतामैत्री
म्याग्दीको बेनीस्थित प्राकृतिक उपचारस्थल तातोपानी कुण्डको मुहान र तलाउको पर्खाल भूकम्पका कारण चर्कीएर पानी चुहिन थालेपछि पुनःनिर्माण गरि क्षमत्ता विस्तार भएको छ । तस्बिर ः सन्तोष गौतम, म्याग्दी, रासस
प्राकृतिक उपचार स्थलका रुपमा परिचित बेनी नगरपालिका–१३ स्थित सिङ्गा तातोपानी कुण्डलाई अपाङ्गमैत्री बनाइएको छ ।
अपाङ्गता भएका, अशक्त र ज्येष्ठ नागरिकलाई सहज रुपमा स्नान गर्ने व्यवस्था मिलाउन कुण्डको संरचनालाई अपाङ्गमैत्री बनाइएको हो । ह्विलचियरमार्फत पुग्न सकिने बनाइएको कुण्डभित्र पनि कुर्चीमा बसेर स्नान गर्न मिल्ने व्यवस्था गर्न लागिएको तातोपानी कुण्ड व्यवस्थापन समितिका उपाध्यक्ष योगेन्द्र केसीले बताउनु भयो ।
उहाँका अनुसार कुण्डको मर्मत र क्षमता विस्तारका क्रममा तातोपानी बजारदेखि कुण्डको तलाउसम्म पुग्ने बाटोलाई ह्विलचियर गुड्न सक्ने बनाइएको हो । यसअघि ढाडको समस्या भएका, अपाङ्गता भएका र अशक्तलाई पिठ्यूँ, डोको र स्टेचरमा राखेर कुण्डमा लैजाने गरिएको थियो ।
पहिले एक पटकमा तिन सय जनाले स्नान गर्ने तलाउको क्षमत्ता बढाएर चार सय जनाले डुब्न सक्ने बनाइएको छ । ४१ फिट लम्बाई र २१ फिट चौडाईको तलाउको चारै तिरका भित्तामा टायल राखिएको छ । चारैतिर रेलीङ राखिएको छ । पुरुष र महिलाको लागि स्नान गर्न तलाउलाई दुई भागमा बिभाजन गरिएको छ । तलाउमा यसअघि उत्तर र दक्षीण तर्फ प्रवेशद्धार रहेकोमा पश्चिमतर्फ पनि एक वटा प्रवेशद्वार बनाइएको छ । मर्मतसँगै क्षमता विस्तार र संरचनालाई सुधार गरिएको हो । स्नानका लागि आउने बिरामीको चाप बढेकाले कुण्डको क्षमता बढाएर संरचनालाई महिला र अपाङ्गमैत्री बनाइएको समितिका अध्यक्ष वीरेन्द्रमान शाक्यले जानकारी दिनुभयो ।
यस स्थानमा प्राकृतिक रुपमा गन्धक र बिरेनुनसहित ५७ डिग्री तातोपानी निस्कने मुहान रहेको छ । ग्यास्ट्रिक, बाथरोग, ढाड दुख्ने, छालासम्बन्धी रोग, सुन्निएको, बज्रिएको, मर्किएको, पेट सुन्निने, गलगाँड र एसाइटिस रोगका बिरामी उक्त तातोपानी सङ्कलन गरिएको तलाउमा स्नान गरेर उपचारका लागि आउने गरेका छन् ।
देशका विभिन्न जिल्लाबाट कुण्डमा स्नान र उपचारका लागि वार्षिक १५ हजार जनाको अनुपातमा बिरामी आउने गरेको व्यवस्थापन समितिका सचिव मीनबहादुर बानियाँले बताउनुभयो । एक हप्ता स्नानका लागि प्रतिव्यक्ति दुई सय रुपैयाँ शुल्क तोकिएको छ । रासस
Comments
Tell me what you're thinking...
and oh, if you want a pic to show with your comment, go get a gravatar!