बहिरा विद्यालयमा विदेशी नागरिकले पढ्न थाले
धौलागिरिका बहिरा बालबालिकालाई शिक्षा दिने मुख्य उद्देश्यका साथ स्थापना गरिएको यहाँको धौलागिरि बहिरा प्राथमिक विद्यालयमा विदेशी बहिरा नागरिकले पनि अध्ययन गर्न थालेका छन् ।
भारतको मोतिहारी बिहारका चन्द्र भुसाल साहका बहिरा छोरा अजय साह यो विद्यालयमा कक्षा १ मा अध्ययन गर्दछन् । यहाँ अस्थायी बसोवास गरी कवाडी सङ्कलन कार्य गर्दैआएका चन्द्र भुसालका छोरा अजयलाई आवासीय सुविधासहित अध्ययन गर्न विद्यालयमा निःशुल्क भर्ना गरिएको बहिरा विद्यालयका सहयोगी केबी रानामगरले बताउनुभयो ।
कक्षा ३ सम्म साङ्केतिक भाषामा पढाइ हुने यस विद्यालयमा ६० जना बहिरा विद्यार्थीहरुले आवासीय सुविधासहित पढ्नेगरेका छन् ।
तीमध्ये छात्रा २२ र छात्र ३८ जना रहेको विद्यालयका प्रधानाध्यापक वसन्तजङ्ग राजभण्डारीले बताउनुभयो । हाल बानपा ३ गुठीमा भाडामा भवन लिई अध्यापन गराउँदैआएको यस विद्यालयको बानपा-१ रामरेखामा नयाँ भवन निर्माण भइरहेको छ ।
आधुनिक भवनसहित आगामी शैक्षिकशत्रदेखि सोही भवनमा नै पठनपाठन गराउने गरी निर्माण कार्य भइरहेको विद्यालयले जनाएको छ ।
भवन निर्माणका लागि शिक्षा विभागले रु. ३५ लाख, जिल्ला शिक्षा कार्यालयले रु. आठ लाख २५ हजार, प्लान नेपालले रु. १० लाख ५० हजार, जिविस र बागलुङ नगरपालिकाले रु. एक/एक लाख उपलब्ध गराएका छन् ।
आइएमई फाइनान्सका चन्द्र ढकालले रु. दुई लाख रकम उपलब्ध गराउने र उद्योगपति तथा समाजसेवी पुष्पमान श्रेष्ठले पनि आफ्नोतर्फबाट सक्दो सहयोग उपलब्ध गराउने प्रतिबद्धता जनाएका छन् ।
Comments
Tell me what you're thinking...
and oh, if you want a pic to show with your comment, go get a gravatar!